*प्रशासनाच्या चुकीमुळे माण गावाच्या नावावर अन्याय? राजपत्रात उल्लेख, मात्र प्रसिद्धीपत्रकातून ‘माण’ गायब!*
आमच्या ‘माण’चा उल्लेख का नाही? मेट्रोच्या नामकरणावरून ग्रामस्थांचा सवाल!
मुळशी, दि. २८ ऑक्टोबर : हिंजवडी–शिवाजीनगर मेट्रो सुरू होण्याच्या प्रतीक्षेत असलेल्या नागरिकांसाठी ३ नोव्हेंबर हा दिवस महत्त्वाचा ठरणार आहे. या मेट्रोमुळे हिंजवडी आयटी पार्क परिसरातील वाहतूक कोंडी कमी होण्यास मदत होईल, प्रवासाचा वेळ वाचेल आणि नागरिकांना मोठा दिलासा मिळेल, अशी अपेक्षा आहे. मात्र, या महत्त्वाकांक्षी प्रकल्पाच्या नावावरून आता मुळशी तालुक्यातील माण गावाचा उल्लेख गाळला गेल्याचा मुद्दा चर्चेत आला आहे.
स्थानिक भूमिपुत्र सचिन आढाव यांनी याबाबत नाराजी व्यक्त करत, मेट्रोच्या अधिकृत नावात माणचा समावेश असताना प्रत्यक्ष प्रसिद्धीपत्रक आणि बातम्यांमध्ये केवळ ‘हिंजवडी–शिवाजीनगर’ असा उल्लेख का केला जातो, असा सवाल उपस्थित केला आहे.
राजपत्रात माणचा उल्लेख, मग प्रसिद्धीत दुजाभाव का?
केंद्र सरकारच्या आवास आणि शहरी कार्य मंत्रालयाने २४ एप्रिल २०२४ रोजी प्रसिद्ध केलेल्या भारताच्या राजपत्रातील अधिसूचनेनुसार पुणे मेट्रो लाईन-३ च्या नामसंदर्भात ‘पुणे मेट्रो लाईन-३ (माण–हिंजवडी–शिवाजीनगर)’ असा उल्लेख समाविष्ट करण्यात आला असल्याचे आढाव यांनी निदर्शनास आणून दिले आहे.
मेट्रो प्रकल्पाच्या अधिकृत नावात माणचा समावेश असताना सार्वजनिक प्रसिद्धी, बातम्या आणि इतर प्रचारसाहित्यामध्ये माण गावाचा उल्लेख सातत्याने दिसला पाहिजे. मात्र, अनेक ठिकाणी ‘हिंजवडी–शिवाजीनगर मेट्रो’ असा उल्लेख केला जात असल्याने माण गावाचे नाव बाजूला पडत असल्याची भावना ग्रामस्थांमध्ये निर्माण झाली आहे.
माण परिसरातील जमिनी, योगदान आणि विकासाचा प्रश्न
या मेट्रो प्रकल्पासाठी माण परिसरातील मोठ्या प्रमाणावर जमीन वापरण्यात आली असून, प्रकल्पाच्या उभारणीत स्थानिक गावांचे महत्त्वपूर्ण योगदान आहे. प्रकल्पामुळे परिसरातील दळणवळण, रोजगाराच्या संधी आणि आर्थिक विकासाला चालना मिळण्याची अपेक्षा आहे.
मात्र, प्रकल्पाच्या प्रसिद्धीमध्ये स्थानिक गावाचे नावच गाळले जात असेल, तर ग्रामस्थांच्या योगदानाची दखल कोण घेणार, असा प्रश्न उपस्थित होत आहे. विकासाच्या प्रकल्पाचा लाभ मिळणे जितके महत्त्वाचे आहे, तितकेच त्या विकासामध्ये योगदान देणाऱ्या गावांची ओळख आणि सन्मान जपणेही आवश्यक आहे, अशी भूमिका मांडली जात आहे.
मेट्रोचे स्वागत; पण माणच्या अस्तित्वाकडे दुर्लक्ष नको!
मेट्रो सुरू होणे ही हिंजवडी, माण, मुळशी आणि पुणे परिसरातील नागरिकांसाठी आनंदाची बाब आहे. आयटी क्षेत्रात काम करणारे कर्मचारी, विद्यार्थी, व्यावसायिक आणि दररोज प्रवास करणाऱ्या हजारो नागरिकांना या प्रकल्पाचा फायदा होण्याची अपेक्षा आहे.
त्यामुळे मेट्रोच्या उद्घाटनाला विरोध करण्याचा प्रश्न नसून, विकासाच्या प्रकल्पाच्या प्रसिद्धीमध्ये स्थानिक गावांच्या योगदानाची योग्य दखल घेतली जावी, हीच ग्रामस्थांची अपेक्षा असल्याचे आढाव यांनी स्पष्ट केले.
प्रशासनाने भूमिका स्पष्ट करावी!
ग्रामस्थ सचिन आढाव यांनी उपस्थित केलेल्या प्रश्नानुसार, राजपत्रात आणि अधिकृत कागदपत्रांमध्ये माणचा उल्लेख असेल, तर संबंधित प्रसिद्धीपत्रके, उद्घाटनाचे साहित्य आणि अधिकृत माहितीमध्येही ‘माण–हिंजवडी–शिवाजीनगर मेट्रो’ या नावाचा योग्य उल्लेख केला जातो का, याचे स्पष्टीकरण प्रशासनाने द्यावे.
तसेच भविष्यातील प्रसिद्धीपत्रके, उद्घाटनाचे फलक आणि अधिकृत माहितीमध्ये माण गावाचा उल्लेख सुनिश्चित करावा, अशी मागणी पुढे येत आहे.
मेट्रोचे स्वागत मनापासून; मात्र माणच्या हक्काच्या उल्लेखाबाबत तडजोड का? हा प्रश्न प्रशासनाने स्पष्टपणे सोडवण्याची वेळ आली आहे.
