मनमाड नगर परिषद निवडणुकीच्या रणधुमाळीत एक दुर्दैवी बातमी समोर आली आहे. शिवसेना (उद्धव बाळासाहेब ठाकरे) गटाचे प्रभाग क्रमांक १०-अ मधील उमेदवार आणि गायकवाड चौक परिसरातील रहिवासी नितीन वाघमारे (वय अंदाजे ५०) यांचे सोमवारी रात्री अचानक हृदयविकाराच्या झटक्याने निधन झाले.
नितीन वाघमारे हे मनमाडमधील ज्येष्ठ आणि सक्रिय शिवसैनिक म्हणून परिचित होते. निवडणुकीच्या तोंडावर त्यांच्या अचानक जाण्याने ठाकरे गटाच्या कार्यकर्त्यांना धक्का बसला आहे. पक्षाचे स्थानिक नेते, कार्यकर्ते आणि नागरिक त्यांचे अखेरचे दर्शन घेण्यासाठी मोठ्या संख्येने जमले आहेत.
नितीन वाघमारे यांच्या आकस्मिक निधनामुळे प्रभाग क्रमांक १०-अ मधील निवडणूक प्रक्रियेवर परिणाम होण्याची शक्यता आहे. आचारसंहितेनुसार आता ठाकरे गटाला या प्रभागात नवीन उमेदवार द्यावा लागणार आहे किंवा ती जागा रिकामी राहील.
