Pune
एकनाथ शिंदे यांनी जे पेरलं तेच आता उगवलं आहे. भाजपला शिंदे नकोसे झाल्यामुळे त्यांची जागा दाखवण्याचा कार्यक्रम 'लोटस' (Operation Lotus) सुरु झाला आहे. सत्ताधारी गटातील नाराजी नाट्याचा तिसरा अंक आता सुरु झाला आहे.
कवडीची किंमत द्यायला तयार नाही. नाराजीचे हे महानाट्य कोसळून पडणार आहे, असे प्रतिपादन ठाकरे गटाचे मुखपत्र असलेल्या 'दैनिक सामना'तून करण्यात आले आहे. 'सामना'तील अग्रलेखातून शिंदे गटावर (Shivsena Shinde Camp) जोरदार टीका करण्यात आली आहे.
Amit Shah & Eknath Shinde: एकनाथ शिंदे-अमित शाह भेटीवर 'सामना'तून खोचक टिप्पणी
महाराष्ट्रात सध्या जे 'नाराजी' महानाट्य सुरू आहे, ते गांभीर्याने घेण्याची गरज नाही. उपमुख्यमंत्री शिंदे दिल्लीतील त्यांचे पक्षप्रमुख अमित शहांना भेटले आणि त्यांनी मुख्यमंत्री फडणवीस व भाजपचे प्रदेशाध्यक्ष रवींद्र चव्हाणांची तक्रार केली, ''हे लोक आमचा पक्ष फोडत आहेत. चव्हाण पैशांचा वापर करून आमचे पदाधिकारी विकत घेत आहेत. हे आम्ही सहन करणार नाही.'' शिंदे यांच्या तक्रारीवर अमित शहा फसकन हसले. शिंदे यांनी विचारले, ''साहब, आप क्यूं हस रहे हो.'' यावर शहा म्हणाले, ''कोण कोणाचा पक्ष फोडत आहे? मुळात तुमचा पक्ष हा आम्ही म्हणजे, भाजपने फोडाफोडी करून बनवला. तुम्ही फुटलात. आम्ही त्याला पक्ष म्हणून मान्यता दिली म्हणून तुम्ही 'पक्ष' वगैरे भाषा वापरत आहात. तुमचा जो काही पक्ष आहे तो भाजपची उपशाखा आहे. शिंदेजी, आप क्रोनॉलॉजी समझ लीजिए. पैसे वाटून माणसे फोडण्यात तुमचा हातखंडा आहे. चव्हाण ते करत असतील तर वाईट वाटून घेण्याचे कारण नाही. आप मुंबई जाओ और रवींद्र चव्हाण के साथ बैठकर चाय पिओ. उगाच फालतू तक्रारी घेऊन दिल्लीकडे येऊ नका.'' शहा-शिंदे यांच्यामधला हा संवाद मनोरंजक आहे. आता शिंदे म्हणतात, ''त्यांची दिल्लीवारी यशस्वी झाली व आपला सन्मान राखण्याचा शब्द श्री. शहा यांनी दिला.'' ही शिंदे यांची बतावणी आहे. स्थानिक स्वराज्य संस्थांच्या निवडणुकीत भाजपने शिंदे यांची अनेक माणसे फोडली. युतीच्या राजकारणात हे शोभत नाही. भारतीय जनता पक्षाने हे असे केले तर आमचा पक्ष टिकणार नाही अशी शिंदे व त्यांच्या लोकांची चिंता आहे. रवींद्र चव्हाण हे ठाणे जिल्ह्यातील आहेत. त्यामुळे 'ज्या गावच्या बोरी, त्याच गावच्या बाभळी' असे म्हणायला हवे, अशी टिप्पणी 'सामना'च्या अग्रलेखातून करण्यात आली आहे.
