Pune
म्हाडाच्या पुणे मंडळातील २० टक्के सर्वसमावेशक योजनेसह १५ टक्के एकात्मिक योजनेतील ४१८६ घरांच्या सोडतीसाठी संगणकीय पद्धतीने अनामत रक्कम भरून अर्ज सादर करण्याचा गुरुवारी शेवटचा दिवस होता.
अर्ज भरण्याची मुदत संपण्याच्या दोन-तीन दिवस आधीच अर्जदारांना अर्ज भरताना अनेक तांत्रिक अडचणी येऊ लागल्या. त्यामुळे २८ ऑक्टोबरला अर्जविक्री-स्वीकृती प्रक्रियेस मुदतवाढ देण्यात आली. त्यानुसार २० नोव्हेंबरपर्यंत संगणकीय पद्धतीने अनामत रक्कम भरून अर्ज सादर करता येणार होता. तर २१ नोव्हेंबरपर्यंत आरटीजीएस-एनईएफटीद्वारे अनामत रक्कम भरून अर्ज सादर करण्यास मुदत देण्यात आली. आता २१ नोव्हेंबरची सोडत ११ डिसेंबरवर गेली.
मुदतवाढीनुसार गुरुवारी रात्री संगणकीय पद्धतीने अनामत रक्कमेसह अर्ज भरण्याची मुदत संपुष्टात येणार होती. मात्र गुरुवारी सकाळपासूनच अर्जदारांना अर्ज भरण्याताना अनेक अडचणी येऊ लागल्या. ईसाईन न होणे, अनामत रक्कम जमा न होणे यासह अनेक तांत्रिक अडचणी सुरु झाल्याच्या तक्रारी पुणे मंडळाकडून मोठ्या संख्येने येऊ लागल्या. त्यानंतर सर्व्हर डाऊन झाले आणि अर्जविक्री-स्वीकृती प्रक्रियाच अडचणीत आली. त्यामुळे पुणे मंडळाने या प्रक्रियेला ३० नोव्हेंबरपर्यंत मुदतवाढ दिल्याची माहिती पुणे मंडळातील वरिष्ठ अधिकाऱयांनी दिली.
या मुदतवाढीमुळे ११ डिसेंबरची सोडत लांबणीवर पडली असून सोडतीची नवीन तारीख लवकरच जाहीर केली जाणार आहे. मात्र म्हाडाच्या सोडतीच्या संगणकीय प्रणालीत सातत्याने तांत्रिक अडचणी येत असल्याने अर्जदारांकडून नाराजी व्यक्त केली जात आहे. म्हाडाची संगणकीय प्रणाली अत्याधुनिक असल्याचा दावा केला जात असताना अशा अडचणी येत असल्याने या प्रणालीसंबंधी अर्जदारांकडून प्रश्न उपस्थित केले जात आहेत.
