Latur
एकनाथ शिंदे यांच्या मंत्र्यांनी राज्य मंत्रिमंडळाच्या बैठकीवर थेट बहिष्कार टाकला आहे. या बैठकीला फक्त उपमुख्यमंत्री एकनाथ शिंदे हेच उपस्थित होते.
बैठकीनंतर शिंदे आणि त्यांच्या मंत्र्यांनी मुख्यमंत्री देवेंद्र फडणवीस यांची भेट घेतली आहे. या बैठकीत स्थानिक स्वराज्य संस्थेच्या निवडणुकीच्या पार्श्वभूमीवर भाजपात होत असलेल्या इन्कमिंगवर आक्षेप नोंदवण्यात आला आहे. त्यानंतर शिंदे यांच्या पक्षाचे नेते तथा मंत्री उदय सामंत हे भाजपाचे प्रदेशाध्यक्ष रवींद्र चव्हाण यांची भेट घेण्यासाठी गेले होते. परंतु ही भेट होऊ शकली नाही. भाजपा तसेच शिवसेनेकडून आमच्यात कोणतीही नाराजी नाही, असे सांगण्यात आले आहे. परंतु सध्या मुंबईत घडत असलेल्या घडामोडी पाहता वेगवेगळ्या चर्चांना उधाण आलेले आहे. असे असतानाच आता माजी मंत्र्याने शिवसेनेच्या महायुतीतून बाहेर पडण्याबाबत मोठं विधान केलं आहे.
मिळालेल्या माहितीनुसार, शिंदे गटातील सर्वच मंत्र्यांमध्ये निधीवाटपाबाबत प्रचंड नाराजी आहे. विकासकामांसाठी आवश्यक असलेला निधी आपल्याला मिळत नसल्याची तक्रार शिंदे गटातील अनेक मंत्र्यांनी मागील काही आठवड्यांत सूचक पद्धतीने व्यक्त केली होती. भाजपसोबत मतभेद असल्याच्या चर्चाही सतत रंगत होत्या. मात्र आजच्या मंत्रिमंडळाच्या बहिष्काराने ही नाराजी आता केवळ चर्चेत नाही, तर प्रत्यक्ष कृतीत उतरल्याचे दिसत आहे.
दरम्यान, शिंदे गटातील सर्व मंत्र्यांनी मुख्यमंत्री देवेंद्र फडणवीस यांची भेट घेतल्याची माहिती समोर येत आहे. या भेटीत नेमक्या कोणत्या मुद्द्यावर चर्चा झाली, हे अद्याप अधिकृतरित्या स्पष्ट झालेले नाही. परंतु निधीवाटपाच्या तणावामुळेच हा बहिष्कार उगारल्याचे संकेत सूत्रांकडून मिळत आहेत. शिंदे गटातील मंत्री नाराजीच्या भूमिकेत ठाम असल्याचेही सांगितले जात आहे.
