मुंबई प्रतिनिधी ::- हडपसरकरांसह पुणे, रायगड, अहमदनगर आणि नाशिक जिल्ह्यातील लाखो नागरिकांसाठी ही एक अत्यंत आनंदाची, ऐतिहासिक आणि दिलासादायक बातमी आहे. दीर्घकाळ प्रलंबित असलेल्या आणि नागरिकांच्या रोजच्या जीवनाशी निगडित असलेल्या रस्त्याच्या रुंदीकरणाच्या कामाला आता प्रत्यक्ष गती मिळाली आहे.
महाराष्ट्र राज्य पायाभूत सुविधा विकास महामंडळाने (MSRDC) हडपसर ते यवत आणि तळेगाव-चाकण-शिक्रापूर या दोन महत्त्वपूर्ण महामार्गांच्या रुंदीकरणासाठी तब्बल ६,२५० कोटी रुपयांची निविदा प्रसिद्ध केली आहे. यामध्ये केवळ हडपसर–यवत या रस्त्याच्या सहापदरीकरणासाठीच ३,१४६.८५ कोटी रुपयांची निविदा जाहीर करण्यात आली आहे.
ही केवळ आकड्यांची गोष्ट नाही, तर हा प्रकल्प म्हणजे हडपसर मतदारसंघातील आणि संपूर्ण पुणे शहरातील नागरिकांच्या दैनंदिन जीवनात सकारात्मक बदल घडवून आणणारा एक दृढ, ठोस आणि भविष्यदर्शी निर्णय आहे. वाढती वाहतूक, वेळेचा अपव्यय, अपघातांचा धोका आणि प्रवासातील तणाव या साऱ्यांवर हा प्रकल्प कायमस्वरूपी उपाय ठरणार आहे.
या मागणीसाठी पुणे शिवसेनेचे शहर प्रमुख प्रमोद उर्फ नाना भानगिरे यांनी आग्रही भूमिका घेतली होती.
केंद्रीय रस्ते व वाहतूक मंत्री नितीनजी गडकरी आणि महाराष्ट्र राज्याचे उपमुख्यमंत्री एकनाथ शिंदे साहेब यांना सविस्तर निवेदन देत ही मागणी सातत्याने पुढे रेटण्यात आली. या मागणीला सकारात्मक प्रतिसाद देत, महायुती सरकारने या प्रकल्पाला मंजुरी देऊन विकासाच्या दिशेने एक भक्कम पाऊल टाकले आहे.
या सहापदरीकरणामुळे प्रवासाचा वेळ लक्षणीयरीत्या कमी होईल, वाहतूक सुरळीत होईल आणि इतर जिल्ह्यांशी असलेली कनेक्टिव्हिटी अधिक सक्षम होईल. स्थानिक नागरिक, उद्योगपती, व्यापारी आणि रोजचा प्रवास करणारे विद्यार्थी व कर्मचारी यांना याचा थेट लाभ मिळणार आहे.
राज्य सरकारने या निविदा प्रक्रियेला दिलेली गती ही विशेष उल्लेखनीय आहे. नागरिकांच्या अपेक्षा आणि गरजांशी प्रामाणिक राहून काम करणाऱ्या सरकारची ही ओळख आहे. त्यामुळे या प्रकल्पाची कामे वेळेत सुरू होऊन नियोजित वेळेत पूर्ण होतील, अशी अपेक्षा जनतेकडून व्यक्त होत आहे.
या सर्व विकास प्रक्रियेसाठी, तळमळीनं प्रयत्न करणाऱ्या शिवसेनेचे, दूरदृष्टी असलेल्या नितीन गडकरी यांचे आणि जनतेच्या अपेक्षांना न्याय देणाऱ्या एकनाथ शिंदे पुणे शिवसेनेच्या वतीने व हडपसर मतदारसंघाच्या वतीने नाना भानगिरे यांनी आभार व्यक्त केले
